Ronald Docteur, polisye Biwo Lit Kont Trafik Estipefyan (BLTS), jwenn liberasyon l jounen jodi madi 6 jen 2023 a, aprè jij te fin tande li kòm moun ki ta kontribye nan ede frè l sove kite peyi a, pandan lapolis mete avi rechèch dèyè li pou enplikasyon l nan dosye trafik zam ak minisyon ilegal pou legliz Episkopal selon konfimasyon sendikalis, Lionel Lazarre.
Nan yon entèvyou li te bay MagHaïti, responsab Sendika Nasyonal Polis Ayisyen (SYNAPOHA), Lionel Lazarre, fè konnen: «Polisye Ronald Docteur te arete nan dat jedi 1e jen ki sot pase la, li jwenn liberasyon l jounen jodia aprè plizyè polisye parèy li te pote solidarite avèk li epi mande pou voye responsab BLTS la ale ki se Pierre Paul Volcy».
Polisye Ronald Docteur, te akize kòm moun ki ta patisipe nan fè frè li Johnny Docteur, ansyen chèf sèvis franchiz epi asistan Minis Finans ak Ekonomik, sove kite peyi a, akoz non li ta site kòm prezime koupab nan kad trafik zam ilegal ak minisyon sou dosye legliz Episkopal Dayiti.
Atik sa se pwopriyete prive ©️ Gwoup Medya MAGHAITI 2023
