Yon jou aprè move tan blayi sou peyi a, Direktè jeneral pwoteksyon sivil la, Jerry Chandler fè konnen nan yon konferans pou laprès jodi dimanch 4 jen an, yo resanse pou kounya 15 moun mouri, ak 8 lòt ki disparèt. Selon sa l fè konprann, depatman Lwès la se youn nan depatman ki plis touche nan zafè inondasyon sa.
Mete sou kote 15 moun ki pèdi lavi yo ak 8 sila yo pèsonn pa gen nouvèl yo a, responsab la di gen 7 475 fanmi ki sinistre sa ki fè yon total 37 375 moun ki pa gen kote pou yo rete. Nan sa ki gen pou wè ak kay ki pran dlo yo, gen 1 219 kay ki inonde, epi 13 390 moun ki deplase. Tout chif sa yo konsène depatman Nip, Lwès, Grandans, Sidès, Plato Santral, ak Nòdwès.
Pou reponn ak bezwen viktim yo, gouvènman Ariel Henry a nan tèt kole ak Sant Operasyon Ijans Nasyonal (Coun) di yo pran kèk mezi nesesè pou rive ede sila ki nan bezwen yo. Dlo, manje, zafè ijyenik, rive ede moun yo debleye kay yo pou yo ka antre nan yo, se kèk nan bezwen ijan responsab yo vle tanmen.
Yon lòt bò, direktè a soulinye y ap gen pou yo non sèlman bay lanmen ak sila ki frape yo, men tou y ap gen pou pote kole ak lopital nan zòn ki vilnerab yo tankou Leyogàn yon fason pou ranfòse sistèm sante a pou evite maladi kolera ak lòt ankò.
Pandantan sa, direktè Chandler anonse aksyon pou distribye èd yo ap kòmanse depi aprèmidi a. Konsa, li mande tou pou moun yo toujou rete veyatif epi suiv tout konsiy otorite yo etabli.
Atik sa se pwopriyete prive ©️ Gwoup Medya MAGHAITI 2023
