Jij José Martínez kondane jodi vandredi 2 jen an, antreprenè Rodolphe Jaar nan dosye ansasinay ansyen prezidan Jovenel Moïse la. Desizyon sa pran, aprè jij la te finn tande akize a, ki li menm te deja aksepte plede koupab nan dosye a, selon APNews.
Alòske lajistis ameriken bò kote pa l deside mete anba kòd kèk sispèk kle nan lanmò 58yèm prezidan ayisyen an, jodi a jij federal, José Martínez pwononse santans youn nan akize yo ki se Rodolphe Jaar. Nan menm sans la tou, jounal la soulinye antreprenè a te espere y ap ba l yon pi piti pèn akòz li te deside pote kole ak lajistis, men sa pa t anpeche jij la rive kondane l kanmenm pou l pase rès vil nan prizon.
Nan akizasyon ki peze sou do Jaar yo, lajistis ameriken fè konnen se te li k te responsab pou bay sòlda kolonbyen yo zam pou te mennen operasyon pou te touye prezidan Jovenel Moïse la.
Pou kounya, nan 11 sispèk ki sou kontwòl lajistis ameriken yo se sèlman antreprenè a ki te dakò plede koupab e ki gentan jwenn santans li tou. Konsa, li rete pou Mario Palacio, Germán A.Rivera, Jhon Joël Joseph, James Solages, Joseph Vincent, Christian Emmanuel Sanon, Joseph Bergmann, Arcangel Pretel Ortiz, Antonio Intriago ak Walter Veintemilla al di douvan tribinal nan mwa k ap vini yo ki enplikasyon yo gen tout bon nan dosye sa a.
Atik sa se pwopriyete prive ©️ Gwoup Medya MAGHAITI 2023
