Otorite nan vil “Kissimmee” nan eta Florida (Ozetazini), fè konnen 6 atlèt Ayisyen yo ta kite otèl yo te ye a, kote yo te gen pou yo prepare yo pou konpetisyon Jwèt Olenpik la nan Òlando. Men enfòmasyon jodia nan dat 7 jen 2022, ta fè konnen 6 atlèt sa yo sove. Kote yo pa rive jwenn tras yo.
Pandanstan, konpetisyon an te demare depi dimanch ki sot pase la. Pèsonn nan responsab yo pa rive wè tras atlèt yo, malgre se yon zak ki kouran lakay jwè osnon atlèt nou yo. Anpil fwa, yo sèvi ak okazyon sa yo pou yo rete nan peyi lòtbò dlo.
Pou n site non yo, sila sa yo k al reprezante peyi a, se 6 jenn gason byen pòtan ki se: Antoine Mithon, Nicholson Fontilus, Oriol Jean, Peter Berlus, Anderson Petit-frere, Steevenson Jacquet. Jiskaprezan yo poko gen nouvèl youn nan yo, sa vle di yo lage gwo enkyetid, puiske yo pa patisipe nan konpetisyon espesyal Olenpik la.
Pèsonn dirijan Ayisyen poko pwononse sou sa, nan lide pou yo ta bay lanasyon plis enfòmasyon sou sak pase a. Sitiyasyon difisil peyi se ta koz ki souvan eksplike zak mawonaj sa ka atlèt nou yo anpil fwa.
