Sòti 31 me pou rive 7 jen ki sot pase la, Jij pou lapè Jasmin Valenbrun fè konnen gen 5 prizonye ki rive pèdi lavi yo nan prizon sivil Tigwav la. Daprè eksplikasyon jij la bay, prizonye sa yo rive mouri akòz y ap mal manje, e yo manke jwenn bon jan laswenyay, selon kèk medya lokal.
“Malnitrisyon, move kondisyon detansyon, yo manke jwenn swen medikal“, se sa yo jij la di ki pwovoke lanmò endividi sa yo. Nan menm sans la tou, Jij Jasmin fè konnen okenn nan prizonye sa yo pa t gentan pase douvan jij.
Nan yon rapò Biwo Entegre Nasyonzini an Ayiti(BINUH)te fè nan mwa dawout 2022 a, yo te fè konnen gen plis pase 83% moun ki nan prizon ki pa janm jije, men ki malgre sa toujou fèmen nan prizon. Jouskounya, sitiyasyon sa pa rive chanje puiske prizonye yo souvan sibi “detansyon prevantif pwolonje”, olye yo pase douvan jij.
N ap raple nan mwa septanm 2022 a, te gen pou pi piti 2 prizonye ki te deja pèdi lavi yo nan menm kondisyon sa yo nan prizon sivil Tigwav la.
Atik sa se pwopriyete prive ©️ Gwoup Medya MAGHAITI 2023
