Nan yon rezolisyon yo siyen vandredi 10 me 2024 la, manm Konsèy Prezidansyèl Tranzisyon yo fè konnen se pati majorite a k ap gen pou pran tout gwo desizyon yo. Sou 7 konseye ki gen anndan Konsèy la, yo fè konprann yo mete yo dakò pou 5 nan yo jere gwo dosye yo.
«Sòti 7 me 2024 jouk pou rive nan bout manda Konsèy Prezidansyèl la, mete sou kote konsansis, tout gwo desizyon Konsèy la ap gen pou pran se majorite ki la a k ap pran yo», daprè sa a ki ekri nan rezolisyon an.
Yo eksplike, demach sa a fèt se nan lide pou evite gen kriz nan mitan yo menm jan sa a te fèt 30 avril pase a. Se yon moman kote chwa Edgar Leblanc Fils kòm prezidan KPT a epi Fritz Belizaire kòm Premye minis te mete anpil divizyon nan mitan yo.
Nan yon premye tan, yo soulinye dezisyon sa a y ap pale yo gen rapò ak chwa pou Premye minis peyi a, moun k ap vin nan gouvènman an, moun k ap nan Konsèy Elektoral Pwovizwa (KEP) yo, direktè jeneral yo.
Yon lòt kote, yo di tou se 5 manm sa yo k ap gen pou chwazi kilès k ap vin dirijan enstitisyon endepandan yo, anbasadè ak konsil jeneral yo, konsèy administrasyon òganis otonòm yo, kolektivite teritoryal ak moun k ap vin kòmandan fòs piblik yo.
Aksyon sa yo fè a, selon yo menm fèt nan lide pou popilasyon an ka viv byen. Kidonk, yo menm antanke gwo responsab yo pran desizyon pou aji ak lespri yo louvri epi pran tout responsabilite yo pou kapab aji vit epi travay byen pou rezoud kriz peyi d Ayiti ap fè fas kare ak yo a.
N ap soulinye, madi 7 me a 9 manm Konsèy la te fè tout moun konnen chak 5 mwa gen 4 moun nan mitan yo ki pral jwe wòl prezidan. 7 me rive 7 oktòb se ap Edgar L. Fils, 7 oktòb pou 7 mas 2025, Smith Augustin ap jwe wòl pa li a, Leslie Voltaire ap pran l sòti 7 mas 2025 pou 7 dawout epi pou fini Louis G. Gilles ap prezidan sòti 7 dawout 2025 pou rive 7 fevriye 2026.
Atik sa se pwopriyete prive ©️ Gwoup Medya MAGHAITI 2024
