Nan bilan pasyèl Direksyon Jeneral pwoteksyon sivil bay jounen lendi 5 jen an, yo fè konnen gen 42 moun ki mouri, 85 blese epi 11 lòt disparèt. Responsab yo kontinye lanse SOS pou viktim yo paske daprè yo sitiyasyon an parèt difisil pou fanmi sinistre yo.
Nan sa ki gen pou wè ak inondasyon ki te fèt nan divès kote nan peyi a jou ki te samdi 3 jen an, chif viktim yo pa sispann monte. Daprè enfòmasyon responsab direksyon pwoteksyon sivil yo bay pou kounya, gen anviwon 42 moun ki pèdi lavi yo, gen 85 moun ki rive blese epi gen 11 lòt ki disparèt depi evènman yo.
Yon lòt bò, yo fè konnen tou gen 13 633 kay ki pran dlo, sa ki fè gen 7 475 fanmi ki pa gen kote pou yo rete. Nan sans sa, enstitisyon an envite otorite yo ba yo lanmen nan lespwa pou ede moun sa yo sòti nan move pas yo ye jounen jodi a.
Pandantan sa, nan divès zòn tankou bèlans kèk abitan konfye nou yo rive pèdi anpil bèt, kote dlo pase pran pifò jaden yo. Pou kounya, responsab pwoteksyon sivil yo mande pou popilasyon an toujou rete vijilan pandan y ap evite janbe dlo, epi kite zòn ki gen gwo malè pandje sou yo.
Atik sa se pwopriyete prive ©️ Gwoup Medya MAGHAITI 2023
