4 polisye rive pèdi lavi yo nan yon atak ame bandi ak zam fè kote yo tou mete dife nan sou komisarya Bon Repo a jodi jedi 29 fevriye a. Selon Sendika Nasyonal Polis la(SYNAPOHA), polisye sa yo ki mouri a sòti nan divès pwomosyon nan lapolis la.
“SYNAPOHA a resanse gen 4 polisye ki mouri, polisye sa yo sòti nan 26, 31, 32 yèm pwomosyon ak yon enspektè prensipal”, daprè sa responsab yo fè konnen sou kont X yo (Twitè) tousuit aprè kèk odyo t ap sikile kote yon polisyè t ap mande ranfò pou fè fas kare ak prezime bandi yo, sa ki sanble pa t fèt. Sepandan, nan menm atak sa ki fèt la, Sendika a fè konprann san plis detay ta gen pou pi piti 3 lòt polisye ki sòti blese.
Men lis non polisye ki mouri yo selon dènye detay SYNAPOHA a bay : Marion junior yo idantifye kòm enspektè prensipal la ki sòti nan 14yèm pwomosyon lapolis la, Pierre Luciana ajan 2 li te nan 26yèm pwomosyon, Jean Baptiste Guilliamson ajan 1 te nan 31yèm pwomosyon tandiske polisyè Pautrace Resula li menm te ajan 1 e te fè pati 32yèm nan.
Anplis dife yo mete nan espas komisarya a, endividi yo ta sezi yon blende lapolis tou. N ap fè konnen, pou sèlman jodi jedi 29 fevriye a, nèg ak zam pran kontwòl epi mete dife nan 2 sou komisarya nan peyi a, youn nan Pòtay Lewogàn epi lòt la twouve l nan Bon Repo.
Pandantan sa, gen o mwen 15 moun ki blese ak bal k ap resevwa swen pou kounya nan lopital jeneral. Tandiske, gen yon polisye ak yon anplwaye konpayi avyon nan ti ayewopò a ki blese ak bal. Aksyon sila, pase toujou nan moman nèg ak zam t ap tire nan zòn ayewopò a, sa ki lakòz menm yon avyon ki ta pral Kiba te resevwa yon enpak bal tou.
Atik sa se pwopriyete prive ©️ Gwoup Medya MAGHAITI 2024
