Depi aprè gwo tansyon ak panik ki te gen nan lannuit samdi 2 mas la nan zòn Metwopolitèn nan, jounen jodi dimanch 3 mas 2024 la, 4 endividi jwenn lanmò yo nan zòn Taba touprè Inivèsite Fondasyon Jean Bertrand Aristide (UNIFA) depi yèswa, selon jounal radyo Regard F.M.
4 gason ap benyen nan san yo maten an, ladan yo 3 granmoun plis yon ti gason nan blòk Taba. Pèsonn pa konn egzakteman kòz lanmò yo, sofke yo jwenn gen ladan yo ki rache ak manchèt alòske gen lòt ki pran bal. Okenn non viktim yo poko revele, toujou daprè menm sous la.
N ap raple pa gen twò lontan nan dat premye mas ki sot pase la, endividi yo pa te rive idantifye te mete dife nan Ofis Asirans Machin Pou Wout (OAVCT). Kidonk nan moman n ap ekri la, zòn nan blanch epi se kèk bakòp Lapolis k ap siveye Anbasad Amerikèn ki twouve l nan menm zòn nan.
Sou yon lòt bò legliz katolik te anonse yon mach pasifik pou jodi dimanch la, kont premye minis defakto Ariel Henry. Men tou, akòz sitiyasyon sekiritè a ki vinn pi mal pandan 2 dènye jou sa yo, plizyè legliz pa t louvri pòtay yo maten an.
Atik sa se pwopriyete prive ©️ Gwoup Medya MAGHAITI 2024
