Nan yon batay ki te genyen ayè madi 7 fevriye 2023 a, ant abitan nan lokalite Lyankou ak gang savyen yo, gen 2 moun ki rive pèdi lavi yo ak plizyè lòt sòti blese selon jounal Le Nouvelliste. Aksyon sa ta pase akòz popilasyon an pa t deside rete bra kwaze fas ak bandi savyen yo ki te desann nan vil la kote yo detounen yon kamyon sitèn gaz ak yon kamyon siman.
Daprè detay ki bay sou moun yo ki pèdi lavi yo nan afwontman sila a, se ta yon elèv lekòl 10 lane ki al mouri sou kabann lopital, ak yon chofè moto ki te mouri sou plas aprè nèg ak zam te finn simen bal sou abitan yo.
Sitiyasyon tansyon sa a te vinn lakòz tout aktivite te paralize ayè nan lokalite a. Yon lòt bò, Malgre abitan zòn lan pa t kache kò yo pou te fè fas ak gang sila yo, yo te rive ale kanmenm ak kamyon sitèn gaz la ak tout kamyon siman an nan baz yo.
N ap raple depi aprè lanmò 7 polisye yo nan lokalite Lyankou mwa janvye pase a pa gen pyès polisye nan zòn lan. Sa ki vinn pèmèt popilasyon an lage pou kont li kote gang yo pa sispann simen latroublay nan touye sitwayen yo, detounen machin, epi kidnape moun.
Atik sa se pwopriyete prive ©️ Gwoup Medya MAGHAITI 2023
