Lapolis anonse jodi jedi 26 oktòb 2023 a, yo mete men sou 2 endividi ki ta enplike nan bay moun fo viza ameriken. Selon enfòmasyon lapolis la bay, yo fè konnen James Laurent ki se yon avoka nan bawo Mibalè ta li menm tou enplike nan kad dosye sila.
Dadou Nicolas ak James Laurent se non 2 endividi sa yo lapolis di ajan Biwo Zafè Kriminèl (BAC/DCPJ) yo rive arete pandan semèn nan. Konsa, otorite polisyè yo akize yo antanke moun ki gen men yo tranpe nan bay moun fo viza ameriken, ki nan asosiyasyon malfektè ak vòl, epi ki pwovoke anpil dega kont Leta ameriken ak 2 sitwayen ayisyen.
Pou kounya, akize yo nan men lapolis pou tout lòt demach jidisyè yo. N ap raple, sa pa gen lontan depi lapolis te arete 3 avoka ki yo menm tou te sòti nan bawo Mibalè a nan kad dosye pou te efase kèk prèv enpòtan pou Joseph Félix Badio.
Paralèlman lapolis fè konnen tou, sòti madi pou rive jodi jedi 26 oktòb 2023 a, yo arete 2 manb aktif gwoup gang ki t ap tante kite peyi a nan ayewopò Pòtoprens ak nan Okap pou te pran direksyon peyi Nikaragua.
Eddy Mérosier, manb gang Tibwa te jwenn arestasyon l nan ayewopò Entènasyonal Toussaint Louverture, tandiske yo te jwenn Mirtyl Franslot, manm gang Gran grif nan ayopò Entènasyonal Okap la.
Atik sa se pwopriyete prive ©️ Gwoup Medya MAGHAITI 2023
