Nan yon kominike wo komisè Nasyonzini dwa moun nan, Volker Türk pibliye jounen jedi 28 mas 2024 la, li fè konnen sitiyasyon katastwofik nan peyi a lakòz lanmò 1 554 moun pandan 3 premye mwa ane a. Selon sa defansè dwa moun nan eksplike konsekans grav sa yo se dèske fwontyè yo fasilite gwoup gang yo jwenn zam ak minisyon pou yo opere pi byen.
“Li vrèman chokan paske nou konstate depi move sitiyasyon sou teren an, zam yo kontinye ap file rantre. Mwen fè apèl avèk nou pou n mete yon anbago ki pi efikas sou zam yo an Ayiti”, se sa wo komisè nan Nasyonzini pou dwa moun nan di kòm repwòch pou kominote entènasyonal la.
Nan menm rapò sa, li soulinye ant peryòd 25 septanm 2023 pou rive 29 fevriye 2024, selon enfòmasyon yo jwenn nan Biwo Entegre Nasyonzini (BINUH) an, gen plis moun ki viktim toujou sitou lè yo konsidere detay ekspè ki travay nan wo komisarya sou sitiyasyon dwa moun an Ayiti, Will Ornell.
“Nou jwenn an total moun ki mouri ak blese an rezon gwoup gang ki konsiderab ki ogmante an 2022. 4 451 mò ak 1 668 blese, presizeman gen 1 554 ki mouri pou lane 2024 la epi 826 blese pou rive jiska 22 mas sila“.
Paralèman, Volker fè konprann sitiyasyon sa mande pou ta gen yon aksyon rapid epi entèlijan pou fè fas avèk katastwòf Ayiti a.
“Tandiske koripsyon, enpinite epi move gouvènans ogmante nivo vyolans gang yo k ap detui eta dwa nou epi mennen enstitisyon nou yo nan wout pou plonje. Anplis enpak ensekirite jeneral la sou popilasyon an vrèman tèrib epi deteryore, alòske popilasyon an prive anpil bagay ni pa jui dwa li yo“, pou fini ak sa responsab onizyen an eksprime nan rapò sila.
© Tous droits réservés – Groupe Média MAGHAITI 2024
