Pwogram Alimantè Mondyal(PAM) prevwa gen yon kriz alimantè ki ka atake peyi Dayiti kote yo fè konnen jodi mèkredi 13 mas 2024 la, gen1.4 milyon moun ki pral tonbe nan grangou akòz operasyon imanitè yo sou wout kanpe. Selon piblikasyon PAM sou paj li anons sa fèt konsa puiske yo fè konnen ensekirite jeneral la limite aksè avèk divès kominote epi finansman.
Alòske y ap mennen divès konba nan kapital la, PAM, fè kwè yo ede anviwon 300 mil moun pandan 10 premye jou nan mwa mas la, avèk manje kuit, distribisyon manje, transfè lajan epi bay manje nan lekòl yo tou.
Malgre dènyè Akò ant Ayiti ak Kenya ki siyen pou pemèt yon deplwaman misyon miltinasyonal sekirite an vrèman pwomèt, yo fè konprann malgre sa, desizyon sila p ap ka retabli lapè vre. Paske selon yo menm, pa rezoud kriz alimantè a an Ayiti li ka gen gwo enpak sou jefò pou retabli sekirite a.
“Ayiti bezwen plis pase gwoup sou teren an, tout yon mezi sekirite dwe akonpanye li avèk yon repons imanitè kòryas. Nou vrèman bezwen finansman pou reponn avèk kriz sa moun fin bliye a”, deklarasyon Cindy Mc Caïn, direktris egzekitif PAM nan.
Anplis, li kontinye pou l ajoute “Operasyon imanitè an Ayiti yo ralanti, nou bezwen plis donatè pou ogmante jefò yo pou kounya, nan lide pou n kapab pote yon repons adapte avèk bezwen moun yo”.
Nan moman an plis pase 362 000 moun se deplase an Ayiti, kote gen pase 35 000 ki kite lakay yo pou sèlman kòmansman ane 2024 la. Yo soulinye anpil moun ki kouri kite lakay yo eseye pran refij yo pou sove lavi yo nan plizyè lekòl, legliz ak chantye yo.
Pwogram Alimantè Mondyal te ede 280 000 Moun depi premye mas ( yo te bay 62 000 manje cho ak 14 000 moun). Toutfwa, yo revele finansman pwogram manje Cho yo ka kanpe nan 2 semèn, si pèsonn pa mobilize pou soutni operasyon yo an Ayiti : «PAM sou teren an e l ap aji, men nou gen bezwen aksè an pèmanans pou founi yon asistans avèk moun yo ki nan bezwen”, se deklarasyon Jean- Martin Bauer, direktè Pwogram Alimantè Mondyal an Ayiti.
Anplis, PAM fè konnen yo gen pwojè pou ede 2.4 milyon moun pou 2024 la avèk yon èd ijans (An espès avèk mwayen Alimantè), si sekirite a pèmèt sa. Kote yo presize y ap bezwen èd gouvènman an pou yo bay manje nan lekòl yo epi mete kanpe pwogram pi long pou ede Ayisyen pwodui pwòp manje yo.
Boutofen, òganizasyon entènasyonal la mansyone yo se pi gran òganizasyon imanitè nan mond lan. Travay yo se pou sove lavi ak sitiyasyon ijans yo epi itilize asistans alimantè pou konstui yon chemen pou lapè, estabilite epi pwosperite pou moun ki te nan pwoblèm, dezas yo epi moun enpak chanjman klimatik la rive sou yo.
Credit Laquotidienne.ma
Atik sa se pwopriyete prive ©️ Gwoup Medya MAGHAITI 2024
